Yun To Bikhre The Magar Kuchh To Kahin Par Kuchh Tha

yun to bikhre the magar kuchh to kahin par kuchh tha

zist ke raqs ka ilzam hamin par kuchh tha

sans be-rabt hui aaKHirash aaine mein

aks ka bab-e-asar lauh-e-jabin par kuchh tha

sang-andaz nigahen bhi shikasta Thahrin

zabt ka bar bhi to dosh-e-makin par kuchh tha

ab ke shayad ye meri tishna-labi jumbish de

tab-e-hasrat lab-e-be-rang zamin par kuchh tha

raushni kasa-ba-dast aai hai KHeme ki taraf

yani darwesh ki diwar-e-yaqin par kuchh tha

saf-ba-saf dang-e-nigahi the sarapa gardun

chadar-e-KHak-numa arsh-e-barin par kuchh tha

jazba-e-tauq-o-salasil hai salamat 'amir'

us ka ehsas-e-hasin taKHt-nashin par kuchh tha