Ye SannaTa Hai Main Hun Chandni Mein

ye sannaTa hai main hun chandni mein

maza bhi KHub hai aawargi mein

labon par muskurahaT gal gile

tera gham ghul gaya meri KHushi mein

zara si der ko khiDki jo khole

farishte ghumenge us ki gali mein

ghaDi ke pair thakte hi nahin kya

ghaDi ijad ki thi kis ghaDi mein

jo miTTi ke banae the KHuda ne

ye aise log hai kuza-gari mein

jo but-KHane mein tujh ko soch len to

bhaTak jate hain rasta bandagi mein

meri pahli mohabbat tum thi jaanan

tumhein zinda rakhunga shairi mein