Lahu Mein Tairte Phirte Malal Se Kuchh Hain

lahu mein tairte phirte malal se kuchh hain

kabhi suno to dilon mein sawal se kuchh hain

main KHud bhi Dub raha hun har ek sitare mein

ki ye charagh mere hasb-e-haal se kuchh hain

gham-e-firaq se ek pal nazar nahin haTti

is aaine mein tere KHadd-o-KHal se kuchh hain

ek aur mauj ki ai sail-e-ishtibah abhi

hamari kisht-e-yaqin mein KHayal se kuchh hain

tere firaq ki sadiyan tere visal ke pal

shumar-e-umr mein ye mah o sal se kuchh hain