Pech-o-tab

phir tasawwur kha riha hai pech-o-tab

phir wahi haijaan-o-harkat karb-o-dard-o-isztirab

phir wahi dhundle nuqush-e-mah-o-sal

phir wahi subh-e-bahaaran phir wahi sham-e-visal

phir wahi bite hue lamhon ki yaad

phir wahi maujen wahi kashti wahi baad-e-murad

phir wahi raqs-e-sharar-e-zindagi

phir wahi husn-e-latafat-rez ki tabindagi

phir wahi wadon pe lutf-e-intizar

phir wahi chashm-e-suKHan-go ke ishaare bar bar

phir wahi dard-e-musalsal ki kasak

phir wahi mauj-e-tabassum-ha-e-pinhan ki jhanak

phir wahi aish-o-tarab ka ehtimam

phir wahi bazm-e-tamanna phir wahi saqi-o-jam

phir wahi aaghaz-e-ulfat ka surur

phir wahi yaadon ke sae zehn mein nazdik-o-dur

phir wahi shorish wahi josh-o-KHarosh

phir kahin diwangi tari na ho ai dil KHamosh