Tumhaare Shahr Mein Itne Makan Gire Kaise

tumhaare shahr mein itne makan gire kaise

mere aziz Thikane dhuan hue kaise

main shahr-e-jabr se guzra to suraKH-ru ho kar

unhen ye fikr lahu ka nishan miTe kaise

suna raha hun kahani hazar raaton ki

ki shahzade ke sar se sinan haTe kaise

hisab KHub rakha tum ne apni lagat ka

mere nisab mein sud-o-ziyan chale kaise

har ek shaKHs tumhaari tarah nahin hota

koi kisi se mohabbat kahan kare kaise

jahan bhi sham hui ghar bana liya apna

makan bahut the magar be-makan rahe kaise

'anis' tum to bahut tez chaal chalte the

zara hamein bhi batao miyan gire kaise