Humse Bhi Gahe Gahe Mulaqat Chahiye

hum se bhi gahe gahe mulaqat chahiye

insan hain sabhi to musawat chahiye

achchha chalo KHuda na sahi un ko kya hua

aaKHir koi to qazi-e-hajat chahiye

hai aaqibat KHarab to duniya hi Thik ho

koi to surat-e-guzar-auqat chahiye

jaane palak jhapakne mein kya gul khilae waqt

har dam nazar ba-surat-e-haalat chahiye

aaegi hum ko ras na yak-rangi-e-KHala

ahl-e-zamin hain hum hamein din raat chahiye

wa kar diye hain ilm ne dariya-e-marifat

andhon ko ab bhi kashf o karamat chahiye

jab qais ki kahani ab anjum ki dastan

duniya ko dil lagi ke liye baat chahiye