PaDhne Bhi Na Pae The Ki Wo MiT Bhi Gai Thi
paDhne bhi na pae the ki wo miT bhi gai thi
bijli ne ghaTaon pe jo tahrir likhi thi
is shahr ke diwar-o-dar aaseb-zada the
galiyon mein bhi ta-hadd-e-nazar barf jami thi
chup sadh ke baiThe the sabhi log wahan par
parde pe jo taswir thi kuchh bol rahi thi
lahraate hue aae the wo amn ka parcham
parcham ko uThae hue neze ki ani thi
Dube hue taron pe main kya ashk bahata
chaDhte hue suraj se meri aankh laDi thi
is waqt wahan kaun dhuan dekhne jae
aKHbar mein paDh lenge kahan aag lagi thi
shabnam ki tarawish se bhi dukhta tha dil-e-zar
ghanghor ghaTaon ko barasne ki paDi thi
main raat taDapta hi raha waqfa-ba-waqfa
pazeb teri yaad ki tham tham ke baji thi
tum ne na suni adl ki zanjir ki aawaz
main ne to KHamoshi ki bhi fariyaad suni thi
palkon ke sitare bhi uDa le gai 'anwar'
wo dard ki aandhi ki sar-e-sham chali thi
Anwar Masood 
(2574) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544