Gul-dan

sal-ha-sal bayaban-e-guman ko sincha

KHun-e-idrak se aab-e-jaan se

tab kahin us mein huwaida hue afkar ke phul

phul jin ko mere beTe teri farhat ke liye

shisha-e-ruh ke gul-dan mein saja laya hun

aur chupke se ye gul-dan main ne

rakh diya hai teri paDhne ki nai mez pe yun

jaise is mez ki takmil thi us ki muhtaj

aur samajhta hun ki in phulon ki nadida hasin KHushbu se

tere kamre ki har ek chiz mahak uTThi hai

kaun jaane ki meri soch mere zoam ki gul-kari ho

fikr ki shoabada-bazi ho tasawwur ki talabgari ho

aur tu siTi bajata hua kamre mein ho daKHil to tujhe

ajnabi bas ka karb

yak-ba-yak sans ke rukne ki aziyyat se ham-aghosh kare

aur jhunjhla ke tu gul-dan ko dariche se pare

phenk de jada-e-sangin ki taraf

pas-e-diwar khaDa

main sunun TuTte gul-dan ki sada

aur mere kanpte honTon se uThe

tere ehsas ki barnai ke be-Tok panapne ki dua

(693) Peoples Rate This

Your Thoughts and Comments

Gul-dan In English By Famous Poet Arif Abdul Mateen. Gul-dan is written by Arif Abdul Mateen. Read famous Poem Gul-dan for youth and Student by Arif Abdul Mateen. Free Download Gul-dan in PDF.