Hayule

samundaron ke muhib tufan mere azaem ke sahilon se shikast kha kar palaT chuke hain

main kohsaron ki hastiyon se bhi aasman ka waqar ban kar ulajh chuka hun

main jangalon ki hawaon ka zor toD deta raha hun apne nafas ki shorida satwaton se

mere tafakkur ki garm-raftariyon se larzan rahe hain sahraon ke bagule

ye zikr hai us tawil mazi ka main akela tha is bhari kaenat mein jab

faqat meri jaan-gudaz tanhai saya ban kar thi sath mere

main un dinon sochta tha mera wajud aaina-dar tab-o-tawan hai jis ko

zawal-e-amadgi se nisbat nahin hai koi

aur aaj jab ki ye mere bachche

jinhen zamane ki aankh ne mere dast-o-bazu ka rup samjha

meri tawanaiyon ke markaz ka aks jaana

mere rag-o-pai mein ek ehsas-e-KHauf har-dam ubhaarte hain

to sochta hun

main kitna kamzor ho gaya hun

hawa ka ek na-tawan sa jhonka bhi un ke pahlu se jab guzarta hai

lakh andeshe jag uThte hain mere dil mein

ajib tashwish gher leti hai jism-o-jaan ki tamam tabinda wusaton ko

main apne bachchon ko apni quwwat kahun ki be-himmati ka mazhar

(1152) Peoples Rate This

Your Thoughts and Comments

Hayule In English By Famous Poet Arif Abdul Mateen. Hayule is written by Arif Abdul Mateen. Read famous Poem Hayule for youth and Student by Arif Abdul Mateen. Free Download Hayule in PDF.