Husn Par Dastaras Ki Baat Na Kar
husn par dastaras ki baat na kar
ye hawas hai hawas ki baat na kar
puchh agle baras mein kya hoga
mujh se pichhle baras ki baat na kar
ye bata haal kya hai lakhon ka
mujh se do chaar das ki baat na kar
ye bata qafile pe kya guzri
mahaz bang-e-jaras ki baat na kar
ishq-e-jaan aafrin ka haal suna
husn-e-isa nafas ki baat na kar
ye bata 'arsh' soz hai kitna
saz par dastaras ki baat na kar
Arsh Malsiyani 
(1149) Peoples Rate This