Aaenge Wo To Aap Mein Hargiz Na Aaenge

aaenge wo to aap mein hargiz na aaenge

hum apni be-KHudi ke tamashe dikhaenge

hum naqd-e-dil jo sine mein apne na paenge

duzd-e-nigah-e-yar ko chori lagaenge

ai be-KHudi jo aap mein hum ab ki aaenge

phir dil-lagi se bhi nahin dil ko lagaenge

jab su-e-dasht aap ke diwane jaenge

farhad-o-qais dur talak lene aaenge

parwana wo kahenge to hum un ko shoala-ru

hum bhi jalaenge jo wo hum ko jalaenge

kyun dabte hain honTh wo danton mein bar bar

kya tegh-e-lab ko aab-e-guhar mein bujhaenge

dam-e-bala se dekhiye kyunkar najat ho

kab tak wo hum ko zulf ki galiyan jhakaenge

wahshi-e-chashm-e-yar jo niklega shahr se

aankhon ko Dhele aahu-e-sahra lagaenge

huron se chal ke dad-e-jamal us ki lenge hum

taswir-e-yar qasr-e-jinan mein lagaenge

uTThenge phir na baiTh ke manind-e-naqsh-e-pa

hum apne zoaf ki tumhein taqat dikhaenge

jage hue firaq ke sote hain zer-e-KHak

bad-KHwab hon ke hum jo farishte jagaenge

lene mein jins-e-dil ke to ujlat kamal hai

dene mein naqd-e-wasl ke barson jhakaenge

garm-e-KHiram honge agar sehn-e-bagh mein

angaron par wo kabk-e-chaman ko luTaenge

sina-sipar hain aashiq-e-jaan-baz saikaDon

tegh-e-nigah-e-naz wo kab aazmaenge

ab ki to hijr-e-yar mein hum gor jhank aae

jite hain to kisi se na phir dil lagaenge

ai shahsawar-e-naz ye miTta hai bar bar

tere samand-e-husn ko hum KHud banaenge

hum kyun itaat in ki karen faeda 'qalaq'

kya ye butan-e-dahr KHuda se milaenge