Maine Usi Se Hath Milaya Tha Aur Bas

main ne usi se hath milaya tha aur bas

wo shaKHs jo azal se paraya tha aur bas

lamba safar tha aabla-pai thi dhup thi

main tha tumhaari yaad ka saya tha aur bas

hadd-e-nigah chaar-su kirnon ka raqs tha

pahlu mein chand jhil ke aaya tha aur bas

ek bheDiya tha dosti ki khaal mein chhupa

is ne mere wajud ko khaya tha aur bas

phir yun hua hawaen thin raqsan tamam-raat

ek taqche mein dip jalaya tha aur bas

donon taraf ki ranjishen ashkon mein bah gain

ek shaKHs mere KHwab mein aaya tha aur bas

is karzar-e-zist mein hum ne tamam-umr

'arshad' kisi ka ishq kamaya tha aur bas