Jo Bujh Gae The Charagh Phir Se Jala Raha Hai

jo bujh gae the charagh phir se jala raha hai

ye kaun dil ke kiwaD phir khaTkhaTa raha hai

muhib qahtur-rijal mein bhi KHayal tera

nae manazir nae shagufe khila raha hai

wo git jis mein teri kahani simaT gai thi

use nai tarz mein koi gunguna raha hai

main wusaton se bichhaD ke tanha na ji sakunga

mujhe na roko mujhe samundar bula raha hai

wo jis ke dam se main us ki yaadon se munsalik hun

use ye kahna wo ghao bhi bharta ja raha hai