Ye Log KHwab Bahut Karbala Ke Dekhte Hain

ye log KHwab bahut karbala ke dekhte hain

magar ghanim ko gardan jhuka ke dekhte hain

suna hai barf-ruten raushni se Darti hain

so ek charagh ko hum bhi jala ke dekhte hain

unhen kaho ki kabhi jangalon ki samt bhi aaen

jo bastiyon mein karishme KHuda ke dekhte hain

junun mein koi izafa nahin hai muddat se

ghubar-e-jism bhi ab ke uDa ke dekhte hain

ye dil hai Thahri hui jhil ki tarah kab se

ab is mein phir koi patthar gira ke dekhte hain

phir ek KHayal ko zanjir kar diya hum ne

phir ek nam ko dil se miTa ke dekhte hain