Nau Manzila Building

zamin ka raqs-e-paiham sard lohe ki nukili kil, zanjir-e-kashish, shane

aur ek nau manzila building

aur is nau manzila building ko apne na-tawan shanon ki baqi-manda quwwat se sambhaale

is fasurda shahr ki sab se baDi footpath par Tangen pasare

har guzarte wahime ko takne wala main

ye barfili hawa thi ya koi lamha

saba-raftar lamha barq-dam lamha

jo meri ungliyon ke darmiyan se KHwab ki manind guzra

kya murur-e-waqt jari hai?

mere laghar badan mein kaun naKHun gaDta hai?

kyun zamin yaKH-basta zamburon mein mere panw jakDe hai

main aaKHir kaun hun? main kaun hun? aur nam

mera nam kya hai? kya main zinda hun?

main zinda hun main zinda hun main apni chiKH sun sakta hun

ik pal ke liye Thahro bas ek pal ke liye Thahro

ki is nau manzila building se apne na-tawan shanon ko main aazad to kar lun

main kahta hun main sunta hun

magar wo gurez-pa lamha hawa ke dosh par uDta chala jata hai ye nau manzila building

mere malik main tanha hun main tanha hun

meri jaanib baDe be-rahm sannaTon mein lipTi sham baDhti aa rahi hai main gira jata hun

bolo! kya main lamhon ki ayalen apni muTThi mein jakaD lun?

kya main is nau manzila building ko apne na-tawan shanon se niche phenk dun

uTh kar khaDa ho jaun

magar main ne

magar main ne to is nau manzila building ki KHatir naKHunon se niw khodi thi

(697) Peoples Rate This

Asad Mohammad Khan's More Poetry

Your Thoughts and Comments

Nau Manzila Building In English By Famous Poet Asad Mohammad Khan. Nau Manzila Building is written by Asad Mohammad Khan. Read famous Poem Nau Manzila Building for youth and Student by Asad Mohammad Khan. Free Download Nau Manzila Building in PDF.