Diye Ki Aankh Se Jab Guftugu Nahin Hoti

diye ki aankh se jab guftugu nahin hoti

wo meri raat kabhi surKH-ru nahin hoti

hawa ke lams mein us ki mahak bhi hoti hai

wo shaKH-e-gul jo kahin ru-ba-ru nahin hoti

kise nasib ye shirini-e-lab-o-lahja

har ek dasht mein ye aab-e-ju nahin hoti

main harf harf mein paikar tera samota hun

ghazal to hoti hai par hu-ba-hu nahin hoti

kabhi kabhi to main KHud se kalam karta hun

kabhi kabhi to ye lagta hai tu nahin hoti