Qasid To Liye Jata Hai Paigham Hamara
qasid to liye jata hai paigham hamara
par Darte hue le jo wahan nam hamara
kya tab hai jo samne Thahre koi us ke
aafat hai ghazab hai wo dil-aram hamara
aaghaz ne to ishq ke ye haal dikhaya
ab dekhiye kya howega anjam hamara
ai charKH isi tarah tu gardish mein rahega
par tujh se na niklega kabhu kaam hamara
ai pir-e-mughan dekhiyo 'asif' ye kahe hai
KHali na rahe mai se sada jam hamara
Asif-ud-Daula 
(940) Peoples Rate This