Dil Ki DhaDkan Ab Rag-e-jaan Ke Bahut Nazdik Hai

dil ki dhaDkan ab rag-e-jaan ke bahut nazdik hai

raat be-awaz be-andaz be-tahrik hai

jam gai hain taron ki aaankhon pe baadal ki tahen

Dub jao zat ke andar falak tarik hai

kal ke lamhe aaj ke lamhon mein mudgham ho gae

dekhna aaankhon mein ab jalwa-numa tahrik hai

tum mere kamre ke andar jhankne aae ho kyun

so raha hun chain se hun Thik hai sab Thik hai

maut ka lamha abhi aaya abhi jaane ko hai

chum lo miTTi ko apni hadiya-e-tabrik hai

dosto aankhen na kholo ThanDi sansen mat bharo

aa gae manzil pe tum 'aslam' bahut nazdik hai