RuTh Kar Nikla To Wo Is Samt Aaya Bhi Nahin

ruTh kar nikla to wo is samt aaya bhi nahin

aur main ne aadatan ja kar manaya bhi nahin

aan baiThi hai munDeron par KHizan ki zard lau

main ne koi peD aangan mein ugaya bhi nahin

phir sulagti ungliyan kis tarah raushan ho gain

us ne mera hath aankhon se lagaya bhi nahin

apni sochon ki bulandi aur wusat kya karun

aasman ka saeban kya jis ka saya bhi nahin

phir gali kuchon se mujh ko KHauf kyun aane laga

jagmagata shahr hai 'aslam' paraya bhi nahin