Shajar Se Mil Ke Jo Rone Laga Tha

shajar se mil ke jo rone laga tha

parinda Dar se bichhDa hua tha

Thaharta hi na tha dariya kahin par

magar taswir mein dekha gaya tha

main tishna-lab agarche lauT aaya

magar dariya ko ye mahnga paDa tha

darun-e-dil KHalish aisi khuli thi

ki jis ka rang chehre par uDa tha

main jab nikla tamanna ke safar par

mere raste mein ek sahra paDa tha

ye duniya jis ghaDi guzri yahan se

main tere KHwab mein khoya hua tha

mohabbat aag hai aisi ki jalna

dilon ke baKHt mein likkha gaya tha