Kash Samajhdar Na Banun

tajraba-kar zehn to sab samajh jata hai

zehn mein sochon ko band kar ke

tala Dal dun

chaalak aankhen to sab kuchh taD leti hain

in par la-ilmi ke shishe chaDha dun

apne hassas dil ko

zara KHatir mein na laun

mazi ka tamam mushahida aur tajraba

jo darj hai zehn par

use miTa Dalun

meri aql mere liye azab ban gai hai

kash samajhdar na banun

siski aur qahqaha

main apne panw tale se jannat nikal kar

baDi KHushi se tumhein saunpne ke liye tayyar hun

main apne panw mein bandhi grihasti ki beDiyon ko

bas thoDa sa Dhila kar rahi hun

ziyaada dur nahin jaungi

ek qahqaha laga kar ek siski bhar kar

ya ek nazm likh kar lauT aaungi

main aazad aurat hun lekin

agar mere bachchon ke baalon mein likhen paD jaen

un ki gardan par pasina mili miTTi nazar aae

mere khanon mein masalahon ki tartib gaDbaD ho jae

bachchon ke home-work ki copy par

not-done likha hua aa jae

ghar aae mehmanon ko KHush-amdid kahte hue

ek cup chae bhi na pila sakun

office se lauTte hue thake hue shauhar se

haal-ahwal bhi na puchhun

to meri sansen ghuTTi hui

aur qahqaha phaTi phaTi aankhen

aur nazm adhura KHwab lagti hai

KHuda ne nubuwwat ata karte hue imam banate hue

puri qalandari ata karte hue

mujh par e'tibar nahin kiya tha

puri qaum ko aala nasl dene ki zimmedari

faqat meri hai

is aaali mansab par kaam karte karte

main thak bhi to sakti hun

meri ittifaqi ruKHsat manzur ho chuki hai

main ja rahi hun ek siski bharne ek qahqaha lagane

aur ek nazm likhne ke liye

chhuTTi aKHlaqi taur par manzur hone ke bawajud

ghar ki har chiz ko mujh se shikayat

kyun hai

bachchon ke chehre par ghussa dekh kar sochti hun

qahqaha ayyashi aur siski ya aas hai

aur nazm panw mein chubha hua kanch ka TukDa hai

meri man kahti hai

tum mujh se achchhi man nahin ho

tum ajab ho ghar shauhar aur bachchon ke alawa

aur bhi kuchh chahti ho

meri beTi mere hath se qalam chhin kar

kahti hai french-fry bana kar do

main sochti hun

meri beTi ko bhi jab

ek qahqahe nazm ya taswir ke liye

apni zindagi ki tijori se

kuchh pal darkar honge

to main use kya mashwara dungi

qahqaha bachpan ki bichhDi hui sakhi

siski hathon se uDta hua panchhi

aur nazm gunah hai