Karta Main Ab Kisi Se Koi Iltimas Kya

karta main ab kisi se koi iltimas kya

marne ka gham nahin hai to jine ki aas kya

jab tujh ko mujh se dur hi rahna pasand hai

sae ki tarah rahta hai phir aas-pas kya

tujh se bichhaD ke hum to yahi sochte rahe

ye gardish-e-hayat na aaegi ras kya

ab tark-e-dosti hi taqaza hai waqt ka

tera qayas gar hai yahi to qayas kya

mana ki tera milna hai mushkil bahut magar

har lamha TuT jae ab aisi bhi aas kya

ek umr ho gai hai yahi sochte hue

apni kitab-e-zist ka hai iqtibas kya

'nadir' kahin to sair ko bahar bhi jaiye

har-dam kisi ki yaad mein rahna udas kya