KHud Ko Kisi Ki Rah-guzar Kis Liye Karen

KHud ko kisi ki rah-guzar kis liye karen

tu ham-safar nahin to safar kis liye karen

jab tu ne hi nigah mein rakkha nahin hamein

ab aur kisi ke zehn mein ghar kis liye karen

kyun tujh ko yaad kar ke ganwaen hasin sham

palkon ko tere nam pe tar kis liye karen

mansub-e-jaan ho aur koi paikar-e-KHayal

kar sakte hain ye kaam magar kis liye karen

kyun chhoD den na sham se pahle hi tera shahr

tujh se bichhaD ke raat basar kis liye karen

kis ke liye charagh jalaen tamam raat

'nasik' phir ehtimam-e-sahar kis liye karen