Ye Kis Maqam Pe Pahuncha Hai Karwan-e-wafa

ye kis maqam pe pahuncha hai karwan-e-wafa

hai ek zahar sa phaila hua fazaon mein

nishan-e-rah ki rakhte to hain KHabar lekin

zaban pe tale hain aur beDiyan hain panw mein

phire hain muddaton insan ki talash mein hum

wo shahr mein nazar aaya hamein na ganw mein

sar-e-niyaz bhi apna kabhi na KHam hoga

jhalak ghurur ki hai aap ki adaon mein

zamin se ta-ba-falak har taraf taffun hai

gulon ki bu ka pata kya chale hawaon mein