Main Sochta Hun Sabaq Maine Wo PaDha Hi Nahin

main sochta hun sabaq main ne wo paDha hi nahin

mere junun ki hikayat mein jo likha hi nahin

main sochta hun zuleKHa ki kuchh KHabar aae

mere siwa kahin yusuf ka kuchh pata hi nahin

main sochta hu ki apne KHuda se kah Dalun

wo sab jo main ne kabhi aaj tak kaha hi nahin

main sochta hun ki sab to the gosh-bar-awaz

wahi tha ek ki jis ne kaha suna hi nahin

main sochta hun kabhi raat ke andheron mein

charagh wo bhi jale jo kabhi jala hi nahin

main sochta hun jo KHamoshiyon ke sahra mein

sada ki dhund mein saat ka kuchh pata hi nahin

main sochta hun ki dana hi aisa kahte hain

ye sar to ghair ke aage kabhi jhuka hi nahin