Zamin Ki Aankh Se Manzar Koi Utarte Hain

zamin ki aankh se manzar koi utarte hain

hawa ka aks chalo ret par ubhaarte hain

KHud apne hone ka inkar kar chuke hain hum

hamari zindagi ab dusre guzarte hain

tumhaari jit ka tum ko yaqin aa jae

so hum tumhaare liye bar bar haarte hain

talash hai hamein kuchh gum-shuda bahaaron ki

guzar chuke hain jo mausam unhen pukarte hain

chamak rahe hain mere KHema-e-suKHan har-su

harif dekhiye shab-KHun kaise marte hain

ye kaisi hairaten darpesh hain aziz-'nabil'

zara Thaharte hain aaseb-e-jaan utarte hain