Ab Kaun Si Mata-e-safar Dil Ke Pas Hai

ab kaun si mata-e-safar dil ke pas hai

ek raushani-e-subh thi wo bhi udas hai

ek ek karke fash hue ja rahe hain raaz

shayad ye kaenat qarin-e-qayas hai

samjha gai ye talKHi-e-paiham firaq ki

ek muzhda-e-visal mein kitni miThas hai

har chiz aa rahi hai nazar apne rup mein

utra hua fareb-e-nazar ka libas hai

ek gardish-e-dawam mein roz azal se hai

wo chashm-e-ba-KHabar ki jo mardum-shanas hai

fitrat kahan thi apni 'tamannai' shabnami

lekin kisi ki shoala-nigahi ka pas hai