Jalti Bujhti Hui Aankhon Mein Sitare Likkhe

jalti bujhti hui aankhon mein sitare likkhe

bab likkhe nahin unwan to sare likkhe

manzar-e-gham tha shafaq rang kahan aks utra

KHun ka rang likha sham ke pyare likkhe

nazr-e-tufan hue sare safinon ke charagh

wo andhere jo nigahon ne sahaare likkhe

paikar-e-sabr-o-raza waqif-e-ramz-e-hasti

dast-e-lamhat ne yun nam hamare likkhe

aagahi ne diye ibham ke dhoke kya kya

sharh-e-alfaz jo likkhi to ishaare likkhe