Khoya Khoya Udas Sa Hoga

khoya khoya udas sa hoga

tum se wo shaKHs jab mila hoga

qurb ka zikr jab chala hoga

darmiyan koi fasla hoga

ruh se ruh ho chuki bad-zan

jism se jism kab juda hoga

phir bulaya hai us ne KHat likh kar

samne koi masala hoga

har himaqat pe sochte the hum

aql ka aur marhala hoga

ghar mein sab log so rahe honge

phul aangan mein jal chuka hoga

kal ki baaten karoge jab logo

KHauf sa dil mein runuma hoga