Subh Ka Bhed Mila Kya Hum Ko

subh ka bhed mila kya hum ko

lag gaya raat ka dhaDka hum ko

shauq-e-nazzara ka parda uThTha

nazar aane lagi duniya hum ko

kashtiyan TuT gai hain sari

ab liye phirta hai dariya hum ko

bhiD mein kho gae aaKHir hum bhi

na mila jab koi rasta hum ko

talKHi-e-gham ka mudawa malum

paD gaya zahr ka chaska hum ko

tere gham se to sukun milta hai

apne shoalon ne jalaya hum ko

ghar ko yun dekh rahe hain jaise

aaj hi ghar nazar aaya hum ko

hum ki shoala bhi hain aur shabnam bhi

tu ne kis rang mein dekha hum ko

jalwa-e-lala-o-gul hai diwar

kabhi milte sar-e-sahra hum ko

le uDi dil ko nasim-e-sahari

bu-e-gul kar gai tanha hum ko

sair-e-gulshan ne kiya aawara

lag gaya rog saba ka hum ko

yaad aai hain barahana shaKHen

tham le ai gul-e-taza hum ko

le gaya sath uDa kar 'baqi'

ek sukha hua patta hum ko