Abdiyat

aur phir donon fanus sine ke bujh jaenge

oDh legi dhuan

dudh ki dhaar ki tarah ujli nazar

naKHun-e-pa se zulfon ke baadal talak

jagmagati hui khaal se

KHwahishon ke pur-asrar mahmil talak

ek tahrir likhegi dimak

fana

har taraf be-hisi

tirgi tirgi

han magar sirf ruKHsar o lab

sirf ruKHsar o lab rakh mein dabi chingariyon ki tarah

jagmagaenge

un par mere aur tere garm boson ki tahrir hai

zindagi

aur phir

waqt ki lamha lamha ubharti hui saKHt diwar gir jaegi

aur apne badan

aur mamuli namon mein tahlil ho jaenge

nur ka peD ban jaenge

aane wale nae mausamon ki hawa

ho ke shaKHon se guzregi aur

aasmani sadaon mein gaya hua

ek la-fani o be-karan git gunjega

aur gunjta hi rahega sada

aur gunjta hi rahega sada

(945) Peoples Rate This

Your Thoughts and Comments

Abdiyat In English By Famous Poet Bashar Nawaz. Abdiyat is written by Bashar Nawaz. Read famous Poem Abdiyat for youth and Student by Bashar Nawaz. Free Download Abdiyat in PDF.