Dam-ba-KHud Hai Chandni Chup-chap Hain Ashjar Bhi
dam-ba-KHud hai chandni chup-chap hain ashjar bhi
aaj ki shab tham gai kyun waqt ki raftar bhi
zist ki naw na jaane kis kinare ja lage
malgaji si dhund hai is par bhi us par bhi
dil ki baaten kahne wale aur aahista zara
gosh-bar-awaz hai koi pas-e-diwar bhi
aansuon ka abr wo barsa ki sab kuchh bah gaya
hasraton ke shahr bhi zaKHmon ke lala-zar bhi
Basheer Munzir 
(799) Peoples Rate This