Nazar Se Guftugu KHamosh Lab Tumhaari Tarah
nazar se guftugu KHamosh lab tumhaari tarah
ghazal ne sikhe hain andaz sab tumhaari tarah
jo pyas tez ho to ret bhi hai chadar-e-ab
dikhai dur se dete hain sab tumhaari tarah
bula raha hai zamana magar tarasta hun
koi pukare mujhe be-sabab tumhaari tarah
hawa ki tarah main be-tab hun ki shaKH-e-gulab
lahakti hai meri aahaT pe ab tumhaari tarah
misal-e-waqt mein taswir-e-subh-o-sham hun ab
mere wajud pe chhai hai shab tumhaari tarah
sunate hain mujhe KHwabon ki dastan aksar
kahaniyon ke pur-asrar lab tumhaari tarah
(1158) Peoples Rate This