Raaz Hai Ibrat-asar Fitrat Ki Har Tahrir Ka

raaz hai ibrat-asar fitrat ki har tahrir ka

mushaf-e-natiq kahan muhtaj hi tafsir ka

mani-e-qadr-o-qaza hai nau-bahaar-e-lala-rang

har dil-e-zarra mein hai jazba nai tamir ka

hikmat-e-adam se hai raushan shabistan-e-jahan

nafs-e-maqsad hai huwaida KHaliq-e-taqdir ka

kawish-e-paiham se duniya ki faza jannat-ada

ye tasarruf hai bashar ki quwwat-e-tasKHir ka

daulat-e-kaunain musht-e-KHak ke daman mein hai

aadmi meamar hai aafaq ki taqdir ka

bahr-e-imka۔n mein habab-asa hai kashti-e-wajud

naqsh-e-fani har tamawwuj sail-e-afat-gir ka

paikar-e-KHaki jahan-e-maKHzan-e-asrar hai

aadmi shahkar hai allah ki taqdir ka

KHun se majbur ke dasht-e-jahan jannat-badosh

shiddat-e-mehnat se dilkash rang hai taswir ka

nala-e-bulbul se fasl-e-gul gareban chaak hai

ghuncha ghuncha said hai baad-e-sahar ke tir ka

maujzan hai qatra-e-shabnam mein sail-e-zindagi

zarra-e-kamtar hai mehwar mehr-e-pur-tanwir ka

iztirab-e-shauq mein dil hath se jata raha

ye asar hai ham-nashin taqrir-e-pur-tasir ka

nashtar-e-wahshat nafas mauj-e-nafas ki sar-kashi

aalam-e-tazir hai dozaKH meri taqsir ka

faqr par isar se hain mutmain ruh-o-zamir

dard-e-dil hai KHas maKHzan ishq ki jagir ka

zarre zarre se hai zahir shahid-e-har-do-jahan

aaina 'bebak' dil hai KHaliq-e-taqdir ka