Dhol Wala

us ne ghurbat ke badan pe

basanti chola pili pagDi

aur sunahri jacket sajai hai

wo TuTi kursi pe

bosida Dhol se pair Tikae

udhDa waqt

sabr ke dhage se sita hai

saji-sanwari gaDi

pas se guzre to

aas aankh mein chamakti hai

us ki bhuk lapakti hai

apni KHushiyon ke aangan mein

Dhol ki thap par

us ke gham ko nachta dekh rahi hun

main soch rahi hun

us ki dukan ka mahnga sauda

kitne saste dam bika hai