Aap Ka Etibar Kaun Kare
aap ka e'tibar kaun kare
roz ka intizar kaun kare
zikr-e-mehr-o-wafa to hum karte
par tumhein sharmsar kaun kare
ho jo us chashm-e-mast se be-KHud
phir use hoshiyar kaun kare
tum to ho jaan ek zamane ki
jaan tum par nisar kaun kare
aafat-e-rozgar jab tum ho
shikwa-e-rozgar kaun kare
apni tasbih rahne de zahid
dana dana shumar kaun kare
hijr mein zahr kha ke mar jaun
maut ka intizar kaun kare
aankh hai tark-e-zulf hai sayyaad
dekhen dil ka shikar kaun kare
wada karte nahin ye kahte hain
tujh ko ummid-war kaun kare
'dagh' ki shakl dekh kar bole
aisi surat ko pyar kaun kare
Dagh Dehlvi 
(3020) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544