Milate Ho Usi Ko KHak Mein Jo Dil Se Milta Hai
milate ho usi ko KHak mein jo dil se milta hai
meri jaan chahne wala baDi mushkil se milta hai
kahin hai id ki shadi kahin matam hai maqtal mein
koi qatil se milta hai koi bismil se milta hai
pas-e-parda bhi laila hath rakh leti hai aankhon par
ghubar-e-na-tawan-e-qais jab mahmil se milta hai
bhare hain tujh mein wo lakhon hunar ai majma-e-KHubi
mulaqati tera goya bhari mahfil se milta hai
mujhe aata hai kya kya rashk waqt-e-zabh us se bhi
gala jis dam lipaT kar KHanjar-e-qatil se milta hai
ba-zahir ba-adab yun hazrat-e-naseh se milta hun
murid-e-KHas jaise murshid-e-kaamil se milta hai
misal-e-ganj-e-qarun ahl-e-hajat se nahin chhupta
jo hota hai saKHi KHud DhunD kar sail se milta hai
jawab is baat ka us shoKH ko kya de sake koi
jo dil le kar kahe kam-baKHt tu kis dil se milta hai
chhupae se koi chhupti hai apne dil ki betabi
ki har tar-e-nafas apna rag-e-bismil se milta hai
adam ki jo haqiqat hai wo puchho ahl-e-hasti se
musafir ko to manzil ka pata manzil se milta hai
ghazab hai 'dagh' ke dil se tumhaara dil nahin milta
tumhaara chand sa chehra mah-e-kaamil se milta hai
(2405) Peoples Rate This