Un Ke Milne Ka Ba-zahir To Yaqin Koi Nahin

un ke milne ka ba-zahir to yaqin koi nahin

wo agar chahen koi shak hai nahin koi nahin

ai junun teri inayat se hai tanhai nasib

aur to sare bayaban mein kahin koi nahin

mutmain jab the to himmat ka tha sath apne hujum

Dar jahan hone laga hum ko wahin koi nahin

ishq ki rahon mein aaya hai ek aisa bhi maqam

sirf ek main hun wahan ahl-e-zamin koi nahin

ek din naqsh-e-qadam par mere ban jaegi rah

aaj sahra mein to tanha hun kahin koi nahin