Ajab Rang-e-tilism-o-tarz-e-nau Hai

ajab rang-e-tilism-o-tarz-e-nau hai

diya hai aag ka miTTi ki lau hai

mujhe sun lengi to dekhengi aankhen

meri aawaz mein suraj ki zau hai

rikab aur bag qabu mein nahin hain

ye asp-e-waqt kitna tez-rau hai

meri tarif ke hain do hawale

qadam aflak par muTThi mein jau hai

nahin hai hurriyat ki koi qimat

magar pinjre ki qimat chaar sau hai

main kya hariyaliyon ki aas bandhun

zamin ke sath sapna bhi giro hai

'tarir' aansu hain aur dhundhlahaten hain

ye kaisi kahkashaon ki jilau hai