Chor-sahib Se DarKHwast

ek surKHi chor ne ghar ka safaya kar diya

ghar jo apna tha use bilkul paraya kar diya

ghar ke kapDe rupaya paisa aur talai zewraat

le gaya hai chor ye saman ba-waqt-e-wardat

ye jo farmaya ki ghaeb ho gae hain zewraat

is ka ye matlab hua choron mein hain kuchh begamat

hai jo us saman mein majmua koi ashaar ka

is se kuchh andaza hoga chor ke mear ka

qimti saman mein murgha bhi shamil hai agar

dusri line pe sochenge phir arbab-e-nazar

chor-sahib ko pakaDne mein police ho ab jo fail

main bataun kis tarah mujrim ko ho sakti hai jail

jis ke ghar chori hui hai bhul jae ye rapaT

yun to dil mein chor ke ho jaegi paida kapaT

nahaq us shahri ke dil ki hasraton ka KHun ho

wo ab ek darKHwast likkhe jis ka ye mazmun ho

chor-sahib aap ne taklif farmai thi raat

ittifaqan so raha tha main ba-waqt-e-wardat

aap mere ghar ba-sad-ummid-o-arman aae the

balki ghar mein apne hi manind-e-mehman aae the

aap ki KHatir na ho pai bahut afsos hai

ghar mein thi us waqt tanhai bahut afsos hai

aap ne KHadim ke ghar ka jo safaya kar diya

jis jagah thi gandagi rahmat ka saya kar diya

is safai ke liye hum aap ke mamnun hain

han abhi ghar mein kai sehhat-talab mazmun hain

chor-sahib aap ko taklif to hogi magar

phir safaya chahta hai kuchh makanon ka gutter

aap phir taklif farmaen jo az-rah-e-karam

is mohalle mein gharibon ka bhi rah jae bharam

ghar ko aaina bana den ab ke jab tashrif laen

waqt pahle se bata den ab ke jab tashrif laen

mera afsana jo ghaeb kar diya hai aap ne

is mein apna rang bhi kya bhar diya hai aap ne

is ka kya hoga ye jo unwan aadha rah gaya

ye bhi lete jaen jo saman aadha rah gaya