Nafraton Ki Nai Diwar UThate Hue Log

nafraton ki nai diwar uThate hue log

kya ajab log hain zindan banate hue log

tera har naqsh miTati hui yaaden teri

aur phir mujh ko teri yaad dilate hue log

kya KHabar kis ko tere hijr ne baKHshi hai najat

jaane wo kaun the ashkon mein nahate hue log

ab to har-gam pe har moD pe mil jate hain

dekh kar mujh ko tera nam bulate hue log

dhup mein saya mile bhi to kahan se 'sadiq'

jal gae phus ke chhappar ko banate hue log