Zamin Par Na Rahe Aasman Ko ChhoD Diya

zamin par na rahe aasman ko chhoD diya

tumhaare baad zaman o makan ko chhoD diya

tabah kar gaya ek lamha-e-KHarab mujhe

ki main ne halqa-e-awargan ko chhoD diya

kahin panah nahin milti lamha bhar ke liye

ki jab se mahfil-e-dil-dadgan ko chhoD diya

bas ek kunj-e-KHas-o-KHak mein sukun mila

so main ne halqa-e-sayyargan ko chhoD diya

tumhaare baad guzishta raha na haal raha

so dil ne KHadsha-e-aindagan ko chhoD diya