Chalti Sanson Ko Jam Karne Laga
chalti sanson ko jam karne laga
wo nazar se kalam karne laga
raat farhad KHwab mein aaya
aur farshi salam karne laga
phir main zahrile kar-KHanon mein
zinda rahne ka kaam karne laga
saf inkar kar nahin paya
wo mera ehtiram karne laga
laila ghar mein silai karne lagi
qais dilli mein kaam karne laga
hijr ke mal se dil-e-nadan
wasl ka intizam karne laga
Fahmi Badayuni 
(2222) Peoples Rate This