Har Samt Pareshan Teri Aamad Ke Qarine

har samt pareshan teri aamad ke qarine

dhoke diye kya kya hamein baad-e-sahari ne

har manzil-e-ghurbat pe guman hota hai ghar ka

bahlaya hai har gam bahut dar-ba-dari ne

the bazm mein sab dud-e-sar-e-bazm se shadan

be-kar jalaya hamein raushan-nazri ne

mai-KHane mein aajiz hue aazurda-dili se

masjid ka na rakkha hamein aashufta-sari ne

ye jama-e-sad-chaak badal lene mein kya tha

mohlat hi na di 'faiz' kabhi baKHiya-gari ne