Nahin Nigah Mein Manzil To Justuju Hi Sahi

nahin nigah mein manzil to justuju hi sahi

nahin visal mayassar to aarzu hi sahi

na tan mein KHun faraham na ashk aankhon mein

namaz-e-shauq to wajib hai be-wazu hi sahi

kisi tarah to jame bazm mai-kade walo

nahin jo baada-o-saghar to haw-hu hi sahi

gar intizar kaThin hai to jab talak ai dil

kisi ke wada-e-farda ki guftugu hi sahi

dayar-e-ghair mein mahram agar nahin koi

to 'faiz' zikr-e-watan apne ru-ba-ru hi sahi