Ye Kis KHalish Ne Phir Is Dil Mein Aashiyana Kiya

ye kis KHalish ne phir is dil mein aashiyana kiya

phir aaj kis ne suKHan hum se ghaebana kiya

gham-e-jahan ho ruKH-e-yar ho ki dast-e-adu

suluk jis se kiya hum ne aashiqana kiya

the KHak-e-rah bhi hum log qahr-e-tufan bhi

saha to kya na saha aur kiya to kya na kiya

KHusha ki aaj har ek muddai ke lab par hai

wo raaz jis ne hamein randa-e-zamana kiya

wo hila-gar jo wafa-ju bhi hai jafa-KHu bhi

kiya bhi 'faiz' to kis but se dostana kiya