Ai Sham Mehrban Ho

ai sham mehrban ho

ai sham-e-shahryaran

hum pe bhi mehrban ho

dozaKHi dopahar sitam ki

be-sabab sitam ki

dopahar dard-o-ghaiz-o-gham ki

be-zaban dard-o-ghaiz-o-gham ki

is dozaKHi dopahar ke taziyane

aaj tan par dhanak ki surat

qaus-dar-qaus baT gae hain

zaKHm sab khul gae hain

dagh jaana tha chhaT gae hain

tere toshe mein kuchh to hoga

marham-e-dard ka do-shaala

tan ke us ang par uDha de

dard sab se siwa jahan ho

ai sham mehrban ho

ai sham-e-shaharyaran

hum pe mehrban ho

dozaKHi dasht nafraton ke

bedard nafraton ke

kirchiyan dida-e-hasad ki

KHas-o-KHashak ranjishon ke

itni sunsan shahrahen

itni gunjaan qatl-gahen

jin se aae hain hum guzar kar

aabla ban ke har qadam par

yun panw kaT gae hain

raste simaT gae hain

maKHmalen apne baadalon ki

aaj panw-tale bichha de

shafi-e-karb-e-rah-rawan ho

ai sham mehrban ho

ai mah-e-shab-e-nigaran

ai rafiq-e-dil-figaran

is sham ham-zaban ho

ai sham mehrban ho

ai sham mehrban ho

ai sham-e-shaharyaran

hum pe mehrban ho