Wahime Ki Ye Mashq-e-paiham Kya

wahime ki ye mashq-e-paiham kya

yas o ummid shadi o gham kya

tum ko is raaz-e-ma-siwa ki qasam

tum pe chhaya hua hai aalam kya

un ke aage gham ek fasana hai

un se kahiye fasana-e-gham kya

aish-e-rafta ki yaad se hasil

qissa-e-KHuld o zikr-e-adam kya

ta-kuja aah-e-zer-e-lab aaKHir

intiha-e-sukut barham kya

gham-e-duniya ba-qadr-e-zarf nahin

hasrat-e-besh o shikwa-e-kam kya

soz-e-gham ki haden nahin miltin

bujh gai aatish-e-jahannam kya

garm-o-sard-e-zamana jo kuchh ho

warna firdaus kya jahannam kya

maut jis ki hayat ho 'fani'

us shahid-e-sitam ka matam kya