Shikast-e-asman Ho Jaunga Main
shikast-e-asman ho jaunga main
zamin ko oDh kar so jaunga main
KHalaon mein mujhe DhunDa karoge
nazar se dur jab ho jaunga main
taDap jis ki bana deti hai pagal
wo yaad-e-ham-safar ho jaunga main
tumhaari aankh ho jaegi zaKHmi
jahan ki gard mein kho jaunga main
mere sajde kabhi ruswa na honge
tumhaara sang-e-dar ho jaunga main
teri sahra-nawardi par hansenge
wo jangali phul jo bo jaunga main
guzar kar dasht se 'salim' junun ke
safar ki aabru ho jaunga main
Farhan Salim 
(803) Peoples Rate This