Ek Ghazal Kahte Hain Ek Kaifiyyat Tari Kar Lete Hain

ek ghazal kahte hain ek kaifiyyat tari kar lete hain

yun duniya par agli chaDhai ki tayyari kar lete hain

kitni mohabbat karta hai wo kaise kahen gar puchh le koi

so aadad-o-shumar ki KHatir zaKHm-shumari kar lete hain

us ke KHwab uThae nahin uThte halki-phulki aaankhon se

aaise mein hum raaten jag ke palken bhaari kar lete hain

bahut ziyaada sehhat-mandi ek tarah ki be-adabi hai

us se milne jate hain to kuchh bimari kar lete hain

jab bhi lahu mein rang-e-KHizan ki saKHti baDhne lag jati hai

chand lab o ruKHsar bula kar jashn-e-bahaari kar lete hain

sabza-e-jaan ke hara-bhara rahne ki ek yahi surat hai

sukha paDte hi aankhon ki nahren jari kar lete hain

itna mal kahan ki dukan bazar-e-mohabbat mein le paen

chhoTa-moTa karobar-e-tah-bazari kar lete hain

aatish-e-shauq siwa karne ko munh phere rahte hain us se

hum se sada-lauh bhi akasr ye hushyari kar lete hain

naKHl-e-umid hara ho jata hai akasr baran-e-karam se

so hum akasr us ke dar par KHud ko bhikari kar lete hain

wo sirf ek ke pas hi rah ke chala jae to KHair nahin hai

ruh o badan aaise mauqon par mara-mari kar lete hain

panw hawa jaise hain hamare jin ka naqsh nahin rah pata

shadi-shuda har rahguzar kuchh din mein kunwari kar lete hain

afsar-e-duniya saKHt sahi 'farhat-ehsas' hain aaKHir hum bhi

daftar mein bhi apni si kuchh kar-guzari kar lete hain